بسم الله الواحد مشينا على اعمان =نبي نشوف اللي انحرمنا نشوفه
ننصى ديار بالحلا مالها اوزان =ديار ماهي عند اهلنا امعروفه
نمشي ولنا ممشى بتوقيت وميزان =بحسابنا يومين ولله شوفه
لاحد عجل فينا ولا احد بزعلان= ولااحد بنا عيت عليهم اظروفه
قدام ننطح ذا المسافات شجعان= وآمالنا بالله وحده امعكوفه
وعقبه مبيت بيوم اصبحنا ركبان=وساعي السلامه في صلاله اظروفه
تفتح قبل يقفل من الله شهيدان = اعمالنا في يوم نرقب اصدوفه
وجينا وشفنا كل شي له الوان=ونبت خضر منه الثمار امقطوفه
نمشي على روضه بها تين ورمان = ومن كل شي شكل نجهل وصوفه
ديار خير وطير وديار وديان = وديار شفت ابها الجبال امصفوفه
على قممها تلبس السحب تيجان= وابدانها من المراعي امحفوفه
مرعى لابل ولخيل فيها وللضان= ومرعى بصر وقلوب جتها شغوفه
جنات ما اظن ادخلت يد انسان = فيها ولا عبثت بشي املقوفه
فيها تشوف اللي انقسم بين الاوطان= يالله عسى بعض البلاد امخلوفه
واخص ديره يا عسى المزن هتان=فيها ويبطي في سماها وقوفه
يسبح مع صوت الرعد قبل الاذهان = اليا زجره امر الملك هل خوفه
يرى لما اللي واقع منه دخان= لا من ضرب فالارض يبني جروفه
يمطر بقاع مزها الحر ما هان = يروي حفر ها قبل يرقى احقوفه
يجري مسيل السيل فيها للاعيان= وتفيض عين من مسيله امغروفه
وأذا ارتفع ماها يجي دور الابدان= تسبح وتشبع كل نفس امشحوفه
على ديار منها العيب ما بان=فيها رجال بالشجاعه امعسوفه
ماهي تعرف الخوف تقبل بالاذقان=وألحى مقابلهم تراها امنتوفه
في بيوت اهلها ذكر خير وايمان=منها الفتى ينشا وتربت اكفوفه
على حقوق الجار قامو بالاتيان=في وقت صارت بالجوار امحذوفه
يالله من رحمتك تعطي بالاحسان= ديار ودها من جلالك امروفه
هذي ليال اربع لنا دون نقصان = وكلن خوي يشيل حمله اكتوفه
وانا وان شفتو علي شين يا اخوان = قبل الحدود اتعلموني احروفه
وصلو على المبعوث للانس والجان= مقدار لولو صار في قاع جوفه