يهيم القلب في وادي غرامه = ويشاف الحب فـ الوادي سنامه
وفيه الود ضامر في حيوده = عليه الشوق واللهفه خطامه
يعرفه من يشوفه بعين عاشق = مداه البين واعيته الملامه
مداه الضيم والحزن اعتصم به = ومداه النور والصبح بمنامه
آلا يا اهل الموده الحب الاول = برى سطام ما تشيله عظامه
برى سطام صد اللي يوده = وهجرانه ونكرانه مقامه
سنين كان يشرب ماي عيني = وسنين من ثمر قلبي طعامه
وسنين كنت فيها زاد روحه = وسنين كان وصلي هو مرامه
بنيت بوسط صدري له مصلى = انا المأموم وهو فيها امامه
قرى لي ما يجوز الصد لحظه = ومن يفعل فقد كافر غرامه
ومن يفعله منا انّا لا له = من اللعنات ما يلقى حطامه
وآراه الحين آخر من يبيني = وآراه حلل ما افتى بحرامه
احسبه من يصون الود لا من = طفى نور الوصل واقبل ظلامه
واحسبه يوم ما يقبل بغيري = وذا عام ٍ مضى لغيري انصرامه
وذا عام ٍ جديد ٍ فيه اعاني = وزاد الحزن في روحي قرامه
آلا وشلون ينسى حلو عهدي = وآلا وشلون يسعى في طمامه
وآلا وشلون يهنى له مبيته = وقبل اعوام ما بات اهتمامه
وآلا يا ذل قلبي كيف يهنى = وكيف يعيش وذا آخر هيامه
وكيف يرق له حـلو ٍ وحالي = وحاليها لغيري صار ادامه
انا الماخوذ والمحروم روحه = وانا المسلوب محبوبه امامه
وانا المظلوم والمعدوم حيله = وانا الغاير وانا الحاير مرامه
وانا لي روح ما خانت مود ِ = وانا لي روح فيها مستهامه
وانا لي روح عن الخفرات تعرض = وعن المحبوب روحي في قوامه
فلا النكران والهجران هيّن = ولا تبرى ولا تبرد سهامه
من اول يوم فرقى اللي احبه = بلغ قلبي من اللوعه فطامه
بلغ قلبي قعر ما كان يخشى = ويبس ما كان ينوي في صرامه
فيا أهل الموده هذا حالي = فهل من صارف ٍ عني سقامه
فهل مثلي عقب هذا براحه = وهل روحي لديكم من كرامه
وآلا حق انما اللذات تفنى = وعمر المرء ان طال مقامه
وآلا احق ان اذا جارت رعيه = ستلقى الله يوما ً في ندامه
وآلا لله يهبط كل شأن ٍ = وآلا لله تخضع كل هامه
وآلا لله ناكل ثم نشرب = وآلا لله حبه واحترامه
فصلو من على يده أهتدينا = رسول الله من خير انامه
عدد ما لاح له في الجو بارق = وعدد ما رف َ بـ الافق حمامه